Decembre 20, 2009
de Rosto
Mi oncle Jack Folin es un
grand inventor e excentric millionarie. Il ganiat su milliones per su
propri eforties. Yo ne di, que il es fro un povri familie. Su matre
havet un lactal farme. To esset li proprietá, quel matre de
Jack recivet pos li divorcie, quande patre de Jack, mi avo, abandonat
les por altri femina, mi futur ava. Tande por patre de Jack li svinal
farme restat, ma bentost il perdit it pro un epidemie de svinal
rabie. Li lactal farme esset li sol fonte de richesse de Jack e su
matre, de quel Jack esset li sol filie. Quande mi oncle atin'et su
legal adultesse, su matre rendit le anc legal possession de su farme,
por que il va occupar se pri li aferes. Ella ne plu volet occupar se
pri to.
Mem un annu ne passat quande Jack venit a hem e dit a su
matre:
- Basta con ti vaccas! Yo ha vendit li farme.
- Esque tu
es foli, Jack? Li farme dat nos regulari renta, e quo nu va esser?
-
Yo comprat alcun plu bon, mam. Nu noi have un charmant usinette por
transformar soyin faseoles! Soyin lacte, soyin caseine, soyin kéfir,
soyin carne! To es li futuritá del homanité. Noi va
devenir millionaries!
- Lass me divinar, Jack. Tui patre dat te ti
ci idé.
- No, mam. Yo leet pri to in un libre. Vi,
"Productes ex soy. Futuritá del homanité".
-
To ne es grav. Tu fat tre stult e senresponsibil cose. Tu es quam tui
desfelici patre. Yo ne vole parlar con te.
Matre de Jack eat
logiar a su sestra quel vivet in Paris. Ella ne respondet a lettres
de su deviat filio, solmen li benigni tanta scrit, que matrinnia es
in bon sanitá, e es tre util por el quam un assistent. Li
tanta tenet un fassonal butique in Paris.
Oncle Jack sufret pro li
querell con su matre. Ma il firmimen decidet pruvar, que il ne es
deviat, e invers il es sur un rect via.
Li soyin faseoles
demonstrat se quam lu magic. Oncle ne fat milliones ex ili, ma ganiat
bon. Ye ti tempore circum soyin productes cert agio existet.
Matre
de oncle Jack bentost comprendet, que ella errat, e ella retornat bon
relationes con su filio.
Quande li agio pri soy poc calmijat,
oncle occupat se pri altri dietic productes. Senfinant idées
pri san nutriment sempre dat le bon pecunie. Il havet su original
teorie pri sanitá, e mem esset regardat quam un guru in cert
sferes de su devoet adeptes.
Forsan alquó rational presenta
se in su doctrines, ya oncle self es tre san hom, e il aspecte mult
plu yun quam un hom de su ver etá. Ma yo deve confesser, que
omni ti soyin productes e altri dietic nutrimentes sembla por me tre
repugnant. Tamen quam un favorit nevo de un amat oncle millionarie yo
ne di le pri mi ver opine. Invers, yo ofte manja con mi oncle in su
propri dietic restoreria.
Alor un vez un tal diné esset.
-
Memora, Paul, noi es to, quo noi manja, - oncle Jack dit.
- E
qualmen noi deve comprender ti ci principie? Esque si noi manja
solmen plantes, dunc noi anc deveni plantes?
- Noi ne deveni
plantes, ma noi recive grav qualitas de plantes. Plantes facilmen
posse incorporar minerales e lumine, e to anc es tre sanosi por
homes.
Yo penat aspecter consenti pri to. Ma intern yo pensat, que
bon hamburger e cola va esser tre sanosi por me pos li diné.
Telefon
de oncle Jack signalat. Il acceptet li clam. "Yes, yes" -
il solmen dit, e in fine: "Tre bon, mersi." Poy il dit
me:
- Paul, yo proposi te viagear con me ad Africa.
- Africa?
Semblimen li clima es tre calid ta? - yo dit to solmen por dir alquó
e ne responder strax. Adver, yo ne savet, quo pensar.
- Ho! In ti
expedition tu deve plu timer frigore quam calore.
- Frigore in
Africa?
- Sur li sómmite del monte Kilimanjaro es sat
frigid, crede me.
Yo esset intrigat. Por poc plu clarificar li
situation, yo dat un plus demande:
- Oncle Jack, tu dit, que to va
esser un expedition. E expeditiones usualmen have alcun scope...
Pos
curt tacie oncle respondet:
- Hm... Tu vide... Yo intente viagear
a un paralel munde, e fro li sómmite del monte Kilimanjaro yo
espera trovar un portal a un paralel spacie.
Yo sentit relaxation.
Ya, to es Jack Folin. Paralel spacie, volant platiles, verdi
homettes, yeti, quo vu vole plu? Yo ne posset regardar tal coses
seriosimen. Li tot idé semblat a me ne plu seriosi quam li
expedition de Vinni-Puh e Cristofer Robin al nordal pol. Certimen sur
Kilimanjaro on posse trovar mult exotic coses. Noi va trovar alcun
cose de indefinit origine, noi va proclamar it quam un exterterrestri
artefact, e noi va esser contenti. Yo demonstrat mi max sincer
mirise:
- Ho, oncle Jack, to es tre interessent! Yo sempre revat
pri alcun de ti specie.
- Tre bon. Deman ye ott hores in matine li
auto va atender te apu tui hem. Quam usualmen, va esser chofero Bill
e li verdi Lexus.
Yo tre aprecia bon matinal dorme. Regularimen yo
stanta me ye dec hores in matine. Ye li matine assignat por comense
del expedition yo avigilat ye sett hores pro alcun desagreabil sente
in mi ventre. Pos curt meditatie yo comprendet li cause. Mi ventre ja
sentit, que durant tot li expedition yo va manjar dietic manjaje de
oncle Jack! E yo mem obliviat questionar oncle Jack, durant quant
tempore noi va esser in li expedition. Pos comprender ti cose yo
strax directet se a mi refrigerator. Til ott hores yo transponet
internaje del refrigerator a interne de mi ventre.
A nin hores li
Lexus arrivat al privat aerodrom de oncle Jack. Li privat aeroplan de
oncle Jack ja esset pret por aviar. Oncle Jack monstrat se in li
intrada del aeroplan. Yo ineat e noi comensat volation. Noi aviat de
California til Tanzania trans Jacksonville, Florida e Dakar, Senegal.
Noi du comfortabilmen disposit se in un comodi litt chambre in li
aeroplan. Sur nor via til Jacksonville oncle explicat me li teoretic
parte de nor expedition. Il dit alcuó simil a lu sequent:
-
Esque tu save, quo es resonantie? Chascun corde de un guitarre have
su ton, o frequentie de oscilation. Imagina, que li guitarre pende
sur un mure, e in li chambre un ton sonorimen sona. Si li sonant ton
es lu sam quam li ton de un ex li cordes, dunc ti corde comensa anc
sonar, quancam nequí tuchat it. Nu imagina, que tu have tre
long corde por guitarre. Las nos dir, un mil footes de longore. Tal
corde es sat ponderosi. Imagina, tu junta un fine del corde che
tegmente de un alt edificie, lass nos dir, ye cent etages. E tui
corde pende del tegmente tra omni etages til terre. Li supra partes
del corde es tendet pro su propri pesa. Tension che centesim etage es
plu fort quam tension che ninantesim. Si tu tucha li corde, dunc li
ton che centesim etage es plu alt quam li ton che ninantesim etage.
Nu resonantie. Alcun ton sona. Ma tot li corde ne posse resonar,
solmen alcun curt fragment del corde inea resonantie. Por plu alt ton
anc li punctu de resonantie es plu alt.
To omne esset sat clar por
me. Yo imaginat ti long corde pendent fro tegmente de un gratta-ciel,
yo imaginat variabil tension de ti long corde. Yo questionat, esque
li punctu de resonantie es li portal a paralel spacie. Oncle Jack
dit, que yo es un genie, que cert talmen to esse, ma solmen vice un
corde por guitarre noi deve parlar pri gravitation. E il comensat
parlar pri gravitation:
- Gravitation anc have variabil tension
dependent de altore. Che nivel de mar li tension de gravitational
campe es plu fort quam sur sómmite de alcun alt monte. Anc che
pol li tension es plu fort quam che equator, pro centripetal
acceleration, quel have su maximum che equator. Ya gravitation e
acceleration equivale. Kilimanjaro es li sat alt monte quel es presc
certimen sur equator, pro to noi directa se a ta.
Yo dit:
- Si
por aperter li portal tu besona valore de tension de gravitational
campe poc min quam lu normal, e si gravitation e acceleration
equivale, tu mey usar un elevator, quel have besonat litt
acceleration.
Oncle Jack respondet:
- Esque tu pensa, que yo ne
fat tal experiment? Ya, yo fat. E yo observat cert effectes prognosat
per li teorie. Ma li problema es, que un elevator ne da sufficent
tempore por completmen inear li resonantie. Quelc hores es besonat
por to.
- Dunc si on sede durant quelc hores sur li sómmite
de Kilimanjaro, on transea al parallel munde?
- Ne sur li sómmite,
ma súper it. Li zeppelin ja attende nos.
- Zeppelin?
-
Yes, zeppelin. Un miracul de modern alt tecnologies. Composit
materiales sur base de carbonic fibres. Absolutmen sin metallin
partes. Alcun metalles, electromagnetic campes posse dar impedient
interferenties. Anc noi va dever forlassar tot nor electronica quam
telefones, e anc alquó simil si esse. Si un veste have metalin
detallies, it anc deve esser forlassat, yo have ci tepid vestes sin
metalin detallies.
- Ma, oncle Jack, si noi have li zeppelin, pro
quo noi besona Kilimanjaro?
- To es tre simpli. Li zeppelin deve
star certimen in su loc, e por to it va esser juntat al monte per tri
long cordes.
- Esque noi va levar se a Kilimanjaro in li
zeppelin?
- Pro quo noi vell perdir tant tempore? Noi va saltar
rectimen al sómmite fro ti ci aeroplan. Ne time, li paracades
es absolutmen secur.
Yo comensat pensar pri to omne. Plu yo
pensat, plu yo despitat. In prim, yo nequande saltat con paracade, e
ya, pensant pri to, yo tre timet. In secund, oncle Jack dat su,
forsan pseudo-sciencial, ma sat convictebil por me teoretic base. Yo
ja pensat pri li expedition quam pri alquó plu seriosi. Li
perspective inear resonantie con alcun gravitational undes anc tre
timisat me. Ye un momente yo comprendet, que to esset ne tre bon idé,
manjar tant multimen hódie in matine. Yo curret al latrine e
forlassat ta presc tot mi dejune. Oncle Jack expresset su
condolentie, que aviada tant mal effecte a me.
Súper
Atlantic Ocean oncle Jack comensat rememorar bible e legendes:
-
Esque tu, Paul, memora li historie pri li turre de Babel? Vi,
ausculta:
"Sur
tot terre un sol lingue, un sol idioma esset.
Movent se de
oriente, ili trovat un valley in li lande Senaar e ili inhabitat se
ta.
E ili dit un ad altri: noi va formar briques e va cocinar les
per foy. E dunc briques vice petres e bitumine vice calce esset che
ili.
E ili dit: lass nos edificar por nos un cité e un
turre til ciel, e noi va ganiar un nomine por nos ante noi va
disperser sur tot facie de terre.
E Senior descendet por observar
li cité e li turre, quel esset edificat de homal filies.
E
Senior dit: vi un sol popul, e omni have un sol lingue, e vi, quo ili
comensat far, e ili ne va cessar far lu intentet;
dunc lass nos
discender e mixter ta lor lingues, por que un ne mey comprender
parlation de altri.
E Senior disperset les fro ta a tot terre, e
ili cessat edificar li cité.
E pro to it esset nominat:
Babel, pro que ta Senior mixtet li lingue de tot terre, e fro ta
Senior disperset les sur tot terre."
Tu
save, Paul, yo aprecia ti ci textu pro que it es un bon exemple,
qualmen homes lee textus, e qualmen ili comprende lu leet, quo ili
vide.
Yo admirat:
- Ti ci textu es tre simpli. Antiqui homes
intentet atin'er ciel, e ili comensat edificar li alt turre por to,
ma Deo ne permisset to, il destructet li turre, e por que ili ne mey
comensar to denov, il creat multitá de lingues e disperset
popules.
- Esque tu auscultat to, quo yo leet nu, Paul? Pardona
me, ma tu dit stran'i coses, queles yo ne vide in li textu. Li textu
ne di, por quo ti homes edificat li turre. "Turre til ciel"
posse significar "max possibil alt turre". In li modern
vive homes edifica alt tele-turres e radio-turres por
telecommunicaties. Certimen por lu sam anc antiqui homes edificat su
turres.
- To sona tro fantastic, oncle Jack.
- Totmen no. Li
afere es tre simpli. In nocte ili fat grand foy sur su alt turre, e
ti grand foy esset videbil de un vicin turre. Ili posset cluder e
aperter su foy, e talmen signalar. Ya, Samuel Morse ne esset li prim
hom, quel inventet tal medie por communicar. In secund, alt turres
servit por orientar. De for distantie homes posset vider, ú es
li cité. Anc alt turres esset usat por pregas. Homes opinet,
que Deo plu bentost va audir un prega, si un hom es plu proxim a
ciel. Forsan tu pensa, que to es naiv. Ma imagina te eant a
triantesim etage sin un elevator. Si tu consenti far to, tui prega
versimilmen es sat seriosi.
- E pro quo, oncle Jack, dunc Deo
esset descontent pri Babelan turre?
- Ú in li textu tu
vide, que Deo esset descontent pri li turre?
- Ma dunc pri quo?
-
Yo pensa, que Deo esset descontent pri li cité, pri Babel.
-
Quo posse esser mal pri edificada de un cité, oncle Jack?
Esque to ne es totmen natural afere por homes?
- Pro que ti homes
pensat, que "La homaro estas unu popolo, la mondo estas unu
lando". Pro que Babel esset intentet quam li cité capital
del munde. Lass me dir, Deo es li prim antiglobalist.
- Dunc, li
homanité nequande va haver un commun lingue?
- Quande
sufficent mult homes va aprender respectar diferent cultures e
religiones, respectar autonomie de altri landes e popules, tande Deo
va permisser un commun lingue por li homanité. Yo talmen
pensa. Ma noi eat for del tema. Yo volet racontar te pri turres. Tu
save, yo de comense intentet edificar un turre sur Kilimanjaro por
atin'er li resonant strate. To vell esser ne tre alt ture, circa un
mil footes.
- Yo ne vell dir, que to ne es alt turre, oncle
Jack.
- Hm... Zikkurat Etemennanki in Babilon, pri quel on di,
quasi it es li turre de Babel, it havet circa tricent footes de
altore. Esque to es desfacil por un modern hom edificar un turre de
triplic altore?
- Ho, to certmen vell esser desfacil por me.
-
Anc yo poy calculat, que usar un zeppelin va esser plu modic. Pro quo
payar plu, si li effect va esser sam? E plus, poy yo forsan va usar
li zeppelin por alcun altri scope, o forsan poy yo va profitosimen
vendir it... Tu save, to es interessent, ma african aborigines have
su propri legendes pri insuccessent provas atin'er ciel per
constructada de un turre. Vi un libre: James George Frazer,
"Folk-lore in the Old Testament". Ausculta:
"Li
tribe alui, habitant che l' supra parte de Zambezi, raconta, que deo
Niambe, quel es li personificatie de sol, vivet alquande sur terre, e
poy il ascendet a ciel along un textura de arane. Un vez li deo venit
a homes, il stantat se sur un alt loc e dit: »Idolisa me«,
e homes respondet a to: »Las nos ear e assassinar Niambe«.
Destranquilisat per ti insolent menacie, li deo hastat forear a ciel,
de ú il versimilimen ante to descendet a terre por alcun
tempore. Tande homes dit: »Lass nos stantar mastes e climbar a
ciel«. E ili comensat erecter mastes, stantant les un sur altri
e juntent les un ad altri, e poy ili grimpat along it ad-supra. Ma
quande ili per ti maniere climbat a grand altitá, mastes
cadet, e omni homes, quel pendet sur it, esset mortalmen aplastat.
Tal lor fine esset."
E
poy altri simil african legendes ea. Qualmen tu aprecia to, Paul?
-
Yo pensa, que yo totmen ne aprecia to, pro que yo nu vide, qualmen
expeditiones simil a nor fini. Sembla a me, oncle Jack, que to es mal
idé, climbar a ciel.
- Ho, ne sucia pri to, Paul. Ti homes
simplimen ne savet convenent tecnologie de ciel-climbada. Anc che
Frazer noi lee un legende del popul toraji, quel habita in Indonesia,
ausculta:
"...legende
pri »grimpant cann«, per quel mortabil entes posse
ascender de terre a ciel. It es un spinosi grimpant plante, quel vaga
circum arbor figuiero, e chascun annu forma un nov anele inbrassant
li trunc. Si un hom vole usar ti plante, il deve de comense avigilar
it de dorme, e por to rupter a splittres sett clobbes a-per li dur
cortice del cann. Tande li cann avigila se, sucusse se, infortia se
per un betel, e questiona li hom, quo il vole. Si li hom peti levar
le a ciel, dunc li cann comanda le sedentar se sur spines o sur li
sómmite, prendent con se sett bambuin vases con aqua quam un
ballast. Levant cann declina se alvez a levul, alvez a dextre, e li
passagero deve chascun vez deversar un parte del aqua, e pro to li
plante denov rectija. Quande atin'et li cupol de ciel, li cann
trabatte un fore in it, acroca se a base de ciel, e con patientie
attende, quande li hom va finir su aferes sur ciel e va voler revenir
a terre. In ti maniere li heroe del legende fa su via a cielal
regiones, por acompleer su mission: reganiar un furtet coliere, far
un incursion a un cielal village e raubar it, o retornar a vive un
mortat home per auxilie del cielal forjero."
Quo
tu pensa pri ti ci variante, Paul?
- To ci es plu bon, ma, oncle
Jack, esque noi intente far alcun simil?
- Tu di pri raubada de
cielal villages? Ho, self-comprensibil, no.
- Ne pri to yo di.
Sembla a me, que nor tecnologie es diferent. Indonesian legende di
nequó pri zeppelines.
- To es detalies. Vide lu principui.
Formant aneles grimpant cann es un simbol de harmonic oscillation, e
avigilar li cann significa iniciar resonantie.
- Esque antiqui
indonesianes savet pri tal coses quam harmonic oscillation e
resonantie?
- Yo pensa, que yes, alcun antiqui homes alquande
havet tal saventie.
- Ho, yo save, pri quo tu di, oncle Jack. Ya,
paleocontactes, Atlantida... Ho, yo comprende...
- Yo vide, tu tre
multimen comprende. Plu bon, lass forlassar ti temas, e lass nos
dinear. Vi li refrigerator, prende fro it alquó tu vole, e
cocina to in li forne.
Yo apertet li refrigerator e tre admirat.
Yes, ta esset dietic manjage de oncle Jack, ma anc ta esset multitá
de normal manjage: pizzas, hotdogs, frit potate, saucisses e altri
fastfood. Yo dit:
- Oncle Jack, yo admirat.
- Tu save, Paul, yo
quam honest hom sempre manja ti dietic manjage, quel yo vendi. Ma pro
quo yo vell tormentar mi nevo? Ya ci ne es mi specialisat
restoreria.
Certimen, mi oncle es un bon hom. Noi agreabilmen
dineat, e yo indormit til Africa.
Triesim parte de nor aviada
esset súper Africa. Yo questionat oncle Jack:
- Si noi va
transear a un parallel spacie, quo atende nos ta e qualmen noi va
retornar de ta?
- Ti munde es simil a nor munde. Ma tempore ta es
plu rapid. Duantquar hores ci equivale quelc minutes ta. Dial unde
existe, ti unde va transportar nos a ta e anc ti unde va retornar
nos. Noi va transear in vesper e noi va retornar in matin. Ma ta noi
va esser durant quelc minutes.
Noi volat súper Africa, sol
ascendet che oriente, e illuminat sinfinant jungles de equatorial
zone jacent sub nos.
Quande noi arrivat a Kilimanjaro, tard matine
esset segun local tempore. Nequande yo va obliviar ti salte al
sómmite con paracade. To esset tre horribil. Tamen noi aterrat
sin damages. Li zeppelin adver ja attendet nos. Noi ineat e it levat
nos a besonat altitá. Yo strax indormit, ya in California ja
esset pos medinocte. In vesper segun local tempore oncle Jack
avigilat me. Il dat me un sac de paracade.
- Pende it a te e esse
alert, - il dit.
- Ho! Denov paracade?
- Noi nu ne posse dir
alquó cert. Simplimen pende it a te e esse alert.
Durant
alcun tempore noi sedet tacent. Sol comensat descender che occidente.
Yo admirat a bel descension de sol e ne strax comprendet, quo evenit.
Yo ne plu sentit li suol sub me. Certimen noi cadet. Fort lumine eat
tra li fenestres.
- Salta for, - oncle criat, ma yo ne posset
comprender, ú exear. Tande il pussat me, e yo exvolat a
exter.
Yo ne posset respirar pro fort fluvie de aer. Yo tirat li
anele del paracade, e it apertet se. Nu yo posset observar circum.
Esset lucid jorne, yo ne posset vider sol, versimilimen it esset alcú
súper me. Sub me bel verdi valley jacet, semblimen ta un grand
forest esset. Yo cadet de grand altitá. Quande yo ja aproximat
a terre, li paisage changeat, denov sol esset che horisonte, yo
aterrat. Alcun arbores esset circa me. Bentost yo trovat oncle Jack,
o forsan il trovat me. Anc ne tre for noi trovat to quo restat del
chambre ex li zeppelin. Li ballon versimilimen restat súper
Kilimanjaro e volat for, pro que li ballon esset exter li strate de
resonantie. Che ni ne esset matine, quam oncle Jack predit, ma esset
vesper, poy nocte venit. Noi videt lumine fro alcun grand cité
e eat a ta.
Noi esset in Colombia. Durant que noi cadet fro li
zeppelin, Terra tornat ye quelc hores, e noi cadet in Colombia, altri
equatorial lande. Documentes e pecunie esset che ni, e noi facilmen
revenit in California.
Yo questionat a oncle Jack:
- Esque tu
intente racontar pri tui decovrition a tot munde?
Il respondet:
-
Ho, yo ne besona to. Yo volet provar un mi teorie, yo fat to, e yo ne
besona alcuó plus. Ma si tu vole racontar pri nor aventuras,
tu mey.
Decembre 9, 2009
Du musicantes de Sverige, Olle Cornéer e
Martin Lübcke, fat un nov musical art-concept con iPhones.
Programistes, quel assistet al musicantes, creat convenent
programage.
Alcun quantitá de iPhones providet per ti
programage posse far li actie. Li iPhones deve esser alcú in
un loc, por ili mey simplimen audir un altri. Si li "cor" o
"orchestre" de iPhones audi alcun ritmic son, ili comensa
far musica de ti son. (Si on posse nominar to quam "musica").
Es to musica o no, ma sona bon interessant. Chascun telefon ausculta
altri telefones, e pena sonar in ritme con li "orchestre".
Li programe in chascun telefon have su individual parámetres,
e ti parámetres posse changear se. Olle Cornéer di, que
in li programage tal coses esset usat, quel es ligat a teorie de
chaos, self-organisant systemas, neuronic retes.
De 2006 annu ili
fat tal coses con quelc computores in un loc, ti computores havet
microfones e altparlatores, e vi, nu ili fa to con iPhones.
Yo
pensa, que to sona quam un sofisticat eco. Tre-tre sofisticat eco.
Tamen on deve self audir e vider to.
Public
Epidemic No
1
http://www.ollecorneer.com/art/public-epidemic-no-1
http://www.bacterialorchestra.com
http://www.membrana.ru/articles/imagination/2009/12/01/213900.html
de Rosto
decembre 4, 2009
Matine comensat. Vinni-Puh
e Svini trincat te con miel che li table in lor comun hem. (Si vu
memora, nobli Svini donat su hem a su amico Ulo, quande povri Ulo
perdit su hem pro un grand storm, e Svini eat viver a Vinni-Puh).
Alor, estival sole lansat su prim radies tra li fenestre, apu quel li
table stat, che quel Vinni-Puh e Svini trincat te con miel. Svini
precipue trincat te, e Vinni-Puh precipue manjat miel. Manjant miel
Vinni-Puh murmurat alcun sub su nase. Alcun qualmen "pum-puru-pum...
pam-para-pam..." Svini, pos auscultar su amico durant alquant
tempore, dit:
- To sembla a me, Vinni, que tu ovra un nov verses
nu.
- Esque yo? Hm.. Tu es rect. Self yo ne comprende, qualmen ti
verses veni in mi cap. Vi, ausculta:
In
verne, estive, autun o hiverne
li urso de pluche ne scri in
caderne,
(advere, yo presc ne conosse litteres),
ma!
pri
omni eventus, pri omni aferes
il ovra poemas
sin alcun
problemas.
-
Ú tu mettet "pum-puru-pum, pam-para-pam", esque in
li comense o in li fine? - Svini questionat.
Vinni-Puh ameditat:
-
"Pum-puru-pum"? Forsan "tram-tara-ram" vell esser
plu bon? O mem "bom-tili-bom"? Yo ne posse selecter. Svini,
lass nos ear a promenada. Bon matinal promenada sempre da alcun nov
idées.
Ili vadet tra li foreste. Vinni-Puh de tempor a
tempor murmurat su sive "bim-bili-bom", sive
"tam-tiri-tam". Pos omnis su "trum-turu-tum",
"tim-tindri-tam" e "rum-puru-rum" il dit:
-
Svini, lass te anc dir alcun pumpurupum.
- E-e-e, nu, atende,
Vinni, yo nu va... Es "din-dili-don" apt?
-
"Din-dili-don"? Ho! Tre bon! E plu?
- Ti-tili-ti!
-
It anc es apt. Nu lass, yo di alcun pumpurupum e poy tu di alcun
pumpurupum e poy denov yo, e talmen un pos altri. Lass...
"Bum-dudu-bum!"
- Din-dindi-li!
- Bam-bara-bam!
-
Don-dili-dan!
- Bu-dubu-du!
- Ki-kiri-ku!
Du amicos comensat
rider, e ili ridet durant quin minutes o plu. Poy Vinni-Puh dit:
-
It es quam tal nor propri lingue, yo vell dir, it es pumpurupumic
lingue. Imagina, noi va ear a Cuniculo, e che il noi va parlar in nor
pumpurupumic lingue, e Cuniculo va comprender nequó!
Svini
consentit, que to ya va esser gayosi. Dunc, ili eat a Cuniculo.
Pos
venir, ili comensat frappar in li porta de Cuniculo, ma nequí
respondet. Evidentmen, activi Cuniculo ja forcurret por alcun su
aferes. Vinni-Puh e Svini intentet forear, quande Cuniculo aparit.
-
Salutes, es agreabil vider vos, ples inear, - Cuniculo dit, polit
quam sempre.
Sin parlar mem un parole, Vinni-Puh e Svini ineat e
sidentat se, tenent totmen seriosi mimica. Poy ili comensat parlar un
ad altri:
- Purum kurum?
- Didilaki naki.
- Rundurin burum
babam.
- Kukurikini bibilini.
- Ha-ha-ha! - ridet Cuniculo, -
to sembla a me, que alquí decidet jocar me parlant in un
lingue, quel me ne comprende.
- It es pumpurupumic lingue, -
Vinni-Puh explicat, juient pro que Cuniculo con tal bon humor
acceptet li joc.
- Yes, yes... Yo vide, que it es alquó de
tal specie. - Cuniculo durat. - Esque alquí de du vu save
alquó pri superanto?
- Si tu di pri sup ex ranes, yo ne
vole saver tal sup, pro que yo ne aprecia to. E qualmen tu, Svini?
-
Anc yo ne vole sup ex ranes.
- Ne sup ex ranes, ma Superanto! Ti
ci lingue have tal nómine pro que it es super-lingue! Yo parla
con omni mi parentes e conossetes in superanto.
(Yo crede, omni
leentes memora, que Cuniculo sempre havet multi parentes e
conossetes, quel in racontas pri Vinni-Puh usualmen talmen esset
nominat, quam "li Parentes e Conossetes de Cuniculo").
Interim,
Cuniculo durat:
- Por exemple, yo di "Sal!"
- Plu
bon, di por exemple "miel", miel es multimen plu gustosi
quam sal. - Vinni-Puh dit. Ye ti moment il rememorat, que Cuniculo
usualmen havet miel e sucrosi lacte, e il comensat regardar al scaf
con manjages de Cuniculo, ma ye sequant moment il rememorat, qualmen
li anterior dejune che Cuniculo finit, e il rapidmen tornat su cap ad
altri látere.
Cuniculo dit:
- "Sal" significa
salutation in superanto. Yo e mi parentes e conossetes aprecia divers
salades: ex carrotte, ex cául, ex petrosel, ex betrap, ex
radis... E noi mette anc sal in salades. Noi nomina un altri per li
parole "ulo". Noi di: "sal, ulo", o "ulo,
sal"...
- "Ulo"?! - simultan admirat Vinni-Puh e
Svini.
- Yes, - Cuniculo sospirat, - yo save, pri qui vu pensat,
ya pri nor alosi amico Ulo, pri ti avie. Unquande anc il esset un de
nos, ex parlantes de superanto, ma il ne plu es con nos,
superantistes. To es tre trist historie. - Cuniculo sospirat un vez
plus.
- Noi ne videt Ulo del passat jovedí. - Vinni-Puh
dit. - Noi deve visitar le. Quo tu pensa, Svini?
- Yo ea con vu, -
Cuniculo dit vice Svini.
Durante que ili eat a Ulo, tempe devenit
plu mal. Sole celat se detra nubes, vente comensat soflar.
-
Forsan to ne es bon, que noi nu ea a Ulo, - Cuniculo dit. - Ulo have
habitu ancor dormir ye ti ci tempore.
- Ye li case, forsan lass
nos ne ear a le nu? - Svini dit.
- Noi ja ha advenit. - Vinni-Puh
dit.
Adver, ili esset in li centre del foreste, ú li
matinal dormon Ulo vivet.
Vinni-Puh frappat in li porta de Ulo,
nequí respondet.
- Vi, quam yo dit, il dormi! - Cuniculo
dit.
Tamen pos quelc tempore li porta apertet e ili videt Ulo in
noctal chapel e pijama, quel penat perfricter su ocules.
- Inea. -
Ulo dit e celat se in su balneari chambre.
Li gastes ineat.
-
Vi, vu vide, il ne dormi. - Vinni-Puh dit.
- Ne tre politosi to
esset. - Cuniculo dit.
Svini solmen sospirat. Humid Ulo ancor in
pijama exeat al gastes.
- Noi peti pardon. Semblimen noi venit tro
temporan. - Cuniculo dit.
- Ho, mi amicos, yo supposa, que to vell
esser logicalmen correct talmen formulisar li pense, que venir
superflumen temporan ne es in tal gradu negativi precedent, quam si
venir superflumen tard. - Ulo respondet.
- In altri paroles, to
vell esser plu mal, si noi venit ye nocte. Venir temporan in matine
ne es tant mal. - Cuniculo ridettat.
- To ne es precisimen to, quo
yo intentet expresser, Cuniculo. Esset un maltemposi die. Terribil
tempeste, sequant su destructiv nature, forbalayat omne in su via.
Pro desfelici coincidentie de circumstanties, mi hem anc devenit un
de victimes de tumultuant elementes. Mi hem esset tornat, cadet, e
grandissim rame fro vicin árbor creat molestant obstacule por
exeation a exteriore. Solmen imaginar ti horrore, si yo sol vell
restar durant mult dies in mi hem quam in trape, qui esset installat
de mal fate! E quande un salvation vell venir, to vell esser tro
tard. Felicimen, mi bon amicos Vinni-Puh e Svini venit in exact
tempore por salvar me.
- Ya, car Ulo, anc tande ili venit tro
temporan. Si ili venit plu tard, ili ne vell besonar anc salvar su
self. - Cuniculo notat.
Ili tacet durant poc tempore, rememorant
ti dramatic eventus. Tempe extra li dom semblimen anc rememorat.
Nubes devenit plu tenebrosi, vente devenit plu fort, it comensat
cantar su trist canzone.
- Cuniculo di, que il save alcun
super-lingue, - Vinni-Puh ruptet li tacentie. - Noi, yo e Svini
parlat in su pumpurupumic lingue, e Cuniculo dit: "Aha! Ma yo
save super-lingue!"
- Pumpurupumic? - Ulo admirat.
Vinni-Puh
e Svini demonstrat su pumpurupumic lingue.
- Vu save, mi opinion
es, que ti superanto es quam vor pumpurupumic, ne alcun altri. - Ulo
dit.
Cuniculo mem saltat pro irritation:
- Qualmen tu di tal
cose? Tu save, que superanto esset creat de un geniosi hom, li nomine
de quel esset Amen. Por sempre memorar il, noi in superanto mem di
"amen" pos chascun frase. Si alquí ne di "amen"
in li fine, to ne es rect. Pro que on sempre deve usar "amen",
noi talmen nomina it, quam "usativ". Li grand profete Amen
creat tant geniosi super-lingue, que on posse parlar in it pri omni
coses. It ne es quam pumpurupumic lingue, quel es solmen por luder.
Bentost omni homes e animales va parlar in superanto!
Ulo ne
consentit:
- Nequande tot munde va parlar tui superanto! Solmen
tui parentes e conossetes va. Pro que vor superanto sona hideosi e
nequí va aprecia it. Ya, eufonie deve presentar se. E, mem, ne
eufonie es lu precipui. Yo solmen volet chanjear quelc coses. Prim,
yo volet, que noi omni ne mey nominar un altri per li parole "ulo".
Pro que sequentualmen yo resta sin su individual nomine!
- De qui
es culpe, que tu have tal nomine? - Cuniculo notat.
- Bon. Yo vell
consenti pri ti malcongruentie. Lass vell esser "ulo". Ma
yo anc ne volet dir "amen" in li fine de chascun frase, e
altri superantistes ne acceptet mi nonconformisme, ili dit, que yo ne
parla regulari superanto. Tande yo ameliorat regules de superanto, e
talmen un nov lingue nascet. Yo nominat it "idealo", pro
que mi lingue es ideal lingue!
Cuniculo ridet:
- Nequí,
except tu, parla tui idealo.
- Lass... Ma yo sufre por ver
ideales...
Ulo e Cuniculo durat discusser, ma Vinni-Puh e Svini ne
plu posset auscultar to, ili eat promenar in li foreste. Vente ja
tranquilijat e sole fat se videbil. Ili vadet e auscultat qualmen
litt avies sur árbores canta. Poy ili incontrat Cristofer
Robin e racontat le pri pumpurupumic, superanto e idealo.
Cristofer
Robin dit:
- Anc yo audit pri un inventet lingue, su nomine es
"exelental". Quande yo va crescer poc plu, yo forsan va
aprender it. Ma vor pumpurupumic lingue es lu max bon!
Felici
Vinni-Puh e Svini eat a su hem.
de Pavel Bortnik
novembre 22, 2009
Exospacial reconossent
galactonave de scorpes aterrat precisimen ye meridie in Historic Parc
de cité Sverdlovsk. Por ne provocar curiositá de
aborigines, per holografic aparatura, li nave prendet aspecte quam un
glebe de rocc, ya tal glebes in multitá trudet se in li
parc.
Li galactonave arivat fro settesim stelle de constellation
Scorpio por reciver plu precisi information pri tecnologic nivel del
planete Terra, quel esset suposit in futuritá in honorabil rol
de scorpianic colonia.
Durant deci hores scorpes prendet e
analisat provas de aer, suol e plantes, segun instruction. Poy ili
equipat li expeditie de un sol scorp, expert descendor Rika
Maru.
Scorpes opinet, que ili es tre simil a terranes. Ma por que
Rika Maru mey esser completmen simil a un aborigino, ili bon grimat e
vestit le.
Pos exear del nave, li descendor movet se along un
strade, ú adavan e adop vadet aborigines. Rika Maru eat de
Historic Parc til cinematograf, e poy il ocasionalmen changeat su
direction e aproximat se a un edificie con necomprensibil indicie
"Regional biblioteca por infantes". Li dechifrator, quel
esset pos reparation, ne precisimen translatet to quam "Convenida
de informisat homes".
Tal indicie tre interesset li scorp, e
il decidet inear.
Alor, il esset in un grand luminosi chambre.
Un
etosi terrana, vestit in blu bata*,
humidisat un pezze de textile in un plenat per aqua stalin vase, e
frictet parquete per ti textile. "El in tal maniere saluta me"
- pensat li scorp. Li terrana rectijat e criat alcun. Li dechifrator
translatet: "Ho, Deo! anc il ea a ta! Curre rapidimen asupra,
seniora Galina va esser descontent pro que tu tarda".
Pos ear
asupra along scalosi via, li scorp ineat un litt, plen de aborigines,
chambre. Colorosi picturas de cosmic contenage pendet sur mures.
Omni
in li chambre ravissentimen parlat un ad altri e chascun a se
self.
Li dechifrator de Rika Maru posset translater solmen un
parte de omni frases. Ma to suficet por changear su imaginore pri
tecnologic nivel de terranes. Vi to quo il audit:
- Un vez plus yo
di, mi resofasatron es capabil explodentar galaxes e transmutar
radiation a energie...
- Memora tu qualmen noi anihilat extranes
fro un vicini galaxe?..
- E quo noi mey fa si ili fro
constellation Scorpio va agresser nos?..
- Noi va influer a les
per convenent radies, e ili va devenir obedient...
- O simplimen
noi va isolar lor planetache in subspacie...
Pos audir to, li
povri consternat scorp, quam lu scaldat, tre rapidmen curret fro li
"Convenida de informisat homes" al galactonave.
Quande
Rika Maru raportat li collectet informacion al capitan del nave, li
capitan strax inviat li information al guvernería, per mental
canale de comunication.
Li response esset telegrafat in li cape
del capitan: "Instantimen vola for. Si persecutet, explodenta li
nave. Vor nomines va esser in li grand libre de historie".
Rubi
alert strax esset proclamat in li nave.
Pos du minutes li nave ja
departet.
Poy li general stab ordonat, que nequel nave mey passar
préter li superplanete Terra plu proxim quam sett
megaparsecus. Si on ne va obedier, on va privar se de su premie por
du annus.
Tamen si Rika Maru ne tant hastat currer fro li
"Convenida de informisat homes", il vell audir, que poy li
president del club proclamat: "Nu li session de nor club por
reverentes de scientific fiction es finit".
Un yuveno hat li problema avigilar se temporan in
matine. De ti cause il regularmen venit a su labor tro tard. Ye un
die su chef, colerant pro to, dit:
- Garda te, si tu solmen un vez
plus va venir tard, yo va demisser te.
Dunc, li yuveno, despitant
pri su posto de labor, decide ear a un medic por auxilie.
-
Doctore, yo ha li problema avigilar me temporan in matine.
- Ye
ti ci casu yo prescri te ti ci pillules. Manja un ante ear dormir, e
tu va vider, tu va avigilar te temporan in matine.
Li yuveno
talmen fat. Vermen, il avigilat se ye 6 hores in matine. Alor, il hat
2 hores ante ear in li oficie. Il lava se in duche, manja bon dejune,
lee jurnale, poy totmen tranquil sedenta se in su automobil ear al
labor. Il veni a su labor punctualmen e incontra su chef, quel es
coleri quam un bestie.
- Basta! - li chef cria. - Ea for! Tu ne
labora ci plu! Yo ne vole vider te plu!
Li yuveno admira:
- Ma
pro quo? Esque yo ne es punctual hodie?
Li chef cria:
- Hodie!
Hodie - yes! Ma yer! Yer ú esset tu?
Novembre 19, 2009
It ja ne es un nova, ma yo ha savet pri to ante ne long e tre admirat. Li decovrition esset fat in 2004 annu. "Blanc pigme" es un classe de stelles. E ti blanc pigmes posse consister de diferent chimic elementes, pro que to es stelles in su final stadie de vive, quande omni transmutaties de elementes ja finit. Un blanc pigme esset decovrit, quel consiste precipue de carbon. Pro grand pression ti carbon totalmen es cristallisat in statu de diamant! Li diametre del diamant es 4 mil kilometres e it situa in alcun 50 luminic annus de nos in constellation Centaurus. Su tecnic nomine es BPM 37093. Scientistes di, que nor matrin stelle Sole anc in fine de su vive va devenir tal grand diamant. Cert, multis de tal diamantes existe in cosmo. BPM 37093 recivet informal nomine "Lucy" pro allusie al canzon de The Beatles "'Lucy In The Sky With Diamonds". In russ lingue un fraseologisme existe - "noi va vider ciel in diamantes" (to es ciel decorat per diamantes). Ti frase significa "noi va cuccessar". Li frase origina fro li teatrage "Oncle Vania" de Anton Tchehov.
www.cfa.harvard.edu/news/archive/pr0407.html
Novembre 17, 2009
Un italiano inea un
bank in New York e demanda parlar a un oficiario concern un prunta.
Li italiano di, que il deve viagear a Italia durant du semanes e
besona pruntar $5,000.
Li oficiario di, que por considerar un
presta li bank besona un garantie de alcun form.
Dunc li italiano
dona li claves de su nov Ferrari, anc il dona documentes por it, lu
technic e de assecurantie. Li automobile es parcat in li strade in
avan a bank.
Li oficiario accepta li auto quam un garantie
sufficent. Li client exeat e li president e su oficiaries ride pri
simpli italiano, quel donat su Ferrari custant 250 mil dollares quam
garantie por pruntar 5 mil dollares. Un oficiario parca li Ferrari in
li subterran garage del bank.
Pos du semanes li italiano reveni e
restitui 5 mil dollares, plus paya li interest per 15 dollares 41
centimes.
Li oficiario di:
- Gentile senior, to esset vermen
agreabil, servir por tal client quam vu, e li operation passat totmen
bon. Ma permisse questionar vor, pro que noi es tre confuset. Noi ha
recivet informacion a vor conto, que vu es multimilionario in
dollares. Dunc, pro quo vu besonat pruntar 5 mil dollares de nos?
Li
italiano responde:
- In quel altri loc yo posset parcar mi Ferrari
durant du semanes in New York per 15 dollares 41 centimes, e esperar
reciver it in bon statu?
-------------------------
Yo pruntat ti ci
anecdot fro mi libre "Facil leada in italian lingue".
Italianes ovret ti anecdot, ver dir, yo ne save, esque on posse usar
un bank in New York in tal maniere.
Novembre 15, 2009
Un camelello questiona su
patre:
- Papa, pro quo noi have ti bosses sur nor dorses?
Li
camelo-patre responde:
- To es pro que noi mey haver reserv de
nutrimental substantie quande noi passa tra un deserte.
Li
camelello questiona plu:
- E pro quo nor ocules have long
cilies?
- To es pro que sable de deserte ne mey intrar nor
ocules.
Li camelello questiona poy:
- E pro quo nor fingres
have grand cussinettes?
- To es pro que nor pedes ne mey plongear
se in sable de deserte.
Tande li camelello questiona:
- Casum
quo noi fa ci in li zoologic jardin de London?
Novembre 13, 2009
Un lude de
sequential translationes de un text a quelc slavic auxlingues evenit
in octobre-novembre per internet. Quar slavic auxlingues presentat
se: slovianski, slovioski, slovio, slavski. 7 translationes esset
fat. Un participant havet 48 hores, il recivet li text per e-mail,
translatet a su version de interslavic lingue, poy inviat su text al
sequent participant. Anc li participant translatet li text ad anglesi
e inviat it al master del lude. Li participantes comunica inter se
per anglesi.
To esset expectabil, que li text vell changear se
fortimen. Tamen tal cose ne evenit. Li text restat presc identic,
quancam in altri paroles. It changeat se solmen in quelc micri
detales. Forsan li quantita de translationes ne esset suficent. Si vu
save un slavic lingue, vu posse judicar self, vide
slavlang.ning.com/xn/detail/3940065:Comment:422
Vi
ti
text in occidental:
De
omni locos por resider, lu max joyosi por me es un litt village,
lontan de urbanic bruida, un litt vicinitá. To ne es un
plen-ocupat mult-apartamental domes, ma lignin villagesi domettes,
simplic e ne-discribil logimentes, ú visages de habitantes es
tam bon conosset quam flores in nor jardin. Es un litt aparti munde
quel es isolat e solidisat quam formicas in formiciere, o quam apes
in apiere, o quam agnes in hagatura, o quam nonnas in monaciera, o
quam marineros in nave. Ú chascun hom conosse chascun altri, e
chascun hom es conosset por chascun altri, interessa se pri chascun
altri, e have espera esser intressant por chascun altri. Quam joyosi
to vell esser, metter se ad-in ti ver cordial sentimentes de habitus
sin influentie, far conosset e amat omni vicin homes, con omni lor
individual trates, simplimen quam noi fa conosset e quam noi ama
locuettes e tornes de ombrosi stradettes e lucent prates, queles noi
passa chascun die. Un long sinuosi strade ea che base de valley,
transea un grand via, quel sempre abunda ye carres, cavalcatores e
coches. Esque tu va promenar con me, cortesi letor? Li viage ne va
esser long. Noi va comensar de inferiori loco e continua ad supra.
Octobre 21, 2009
Hodie yo audit un nova fro radio,
que in Japonia ver blu roses va esser vendit ja in novembre.
Blu
rose, qual simbol it es? In mi infantie yo videt nor russian film
"Blu rose". Yo memora, que li film esset tre bell, ma ne
memora detales. Alcun jardinero desirat cultivar blu rose. Yo mem ne
memora, esque il atinget su scope. Forsan pro ti film, blu rose por
me es simbolo de un reve desfacilmen atingebil.
Quande yo comensat
serchar in internet pri blu rose, yo admirat pri popularitá de
ti simbol in li munde. Li simbol have pluri significationes, qui
besona plu mult exploration.
In 19 secul un socie de jardineres
promesset dar premie a un hom, qui va cultivar blu rose.
Nu un blu
rose va custar ¥2000 - ¥3000. Genetic ingenierie fa
miracules. Genetic materiale del flor nominat "viola" esset
usat.
Esque ti blu roses anc have magic qualitas, pri qui on di?
Por exemple, que un hom sentint odor de blu rose ne posse mentir? To
besona plu explorada...
_________________
__________
____
August 30, 2009
In un micri borgo un comerciante
intentet startar su taverne. Il ja comprat li edificie e li date de
apertation ja esset fixat. Omnicos esset bon except un factor: li
edificie del taverne esset apu li eclesia.
Li pastor esset tre
descontent pro to. Ye chascun die li pastor dit a su parocie, que ili
deve pregar, por que Deo vell punir li comerciante.
Ye li die ante
apertation del taverne un grand tonnere evenit, un fúlmine
attin'et li edificie de taverne, e ti edificie hat incendiat.
Li
comerciante appellat al corte, accusant li pastor pro li incendie. Li
pastor negat su relation al casu.
Li judico dit:
- Yo ancor ne
save, qual va esser li verdicte, ma yo comprendet un stran'i cose: li
comerciante crede ye potentie de pregada a Deo, e li pastor ne crede.
Ex http://my.mail.ru/community/ffairytales/69500403BA20379C.html
August 24, 2009
Vivet un yun mann. Il esset tre
coleraci. Il dit rancorosi paroles a homes pro alcun micri motives.
Ye un die su patre dat le un sac de cloves. Li yun mann devet ye
chascun vez, quande il excedet su colere, inbatter un clove ad-in un
singul pal del palissade.
Durante prim die li yun mann ha inbattet
quelc decis cloves. Ye die pos die il aprendet controlar su colere, e
dial quantitá de cloves decrescet.
Ye un die li yun mann
ne inbattet mem un clove. Il dit a su patre pri to. Li patre dit, que
li yun mann nu mey extirar un clove ex li pal ye chascun die, quande
il controla su colere.
Tempóre passat, e ye un die li pal
ne plus havet cloves inbattet. Li patre dit:
- Tu ha successat.
Tamen vide ti-ci multitá de fores in li pal. Ti-ci fores va
restar. Ye chascun vez, quande tu di alcun rancorosi ad un hom, in ti
hom un simil cicatre resta, e quancam tu vell petir pardon, ma un
cicatre va restar.
Fro http://my.mail.ru/community/pritchi.ru/68C53E7A30E79D68.html
August 15, 2009
Li historie de cosmic flores comensa fro Matoni
Wulffi, qui in 2236 annu creat li prim functionant cosmic flor
(nominat quam "prototipe 07"). It esset functionant, ma ne
tre successant, quáncam it auxiliat Matoni Wulffi ganiar su
diploma de ingenier. Grand socie ancor ne interesset pri cosmic
flores.
Ye 21 marte de 2244 annu Matoni con su sestra Veronika
dispensat ad-in cosmic spacie su prim 21 cosmic flores, de specie
nominat quam "cormathys".
Cosmic
flores es quasi-vivent tecnologic objectes, quel producte divers
manjabil substanties fro materie dispersent in cosmic spacie.
Pluparte fro species es de dimension proxim a 1 metr. Cormathys
es de 1.8 m., iacapi
es de 5 m. Species de cosmic flores anc existe, quel posse collecter
se ad-in gruppes. (Por exemple - inkigo.)
Quantitá de singul specie es decis de milion exemplares.
Til
2252 annu cosmic flores esset dispensat fro productent linea. In 2252
annu li prim cormathys aparit, quel posse propagar su self.
Cosmic
flores es spacial jardin, quel ne have limites. Omni homes mey
recoltar.
August 10, 2009
Inundation. Nivele de aqua
cresce. Omni homes efortia abandonar ti loc. Solmen un oldon sede
tranquilmen e prega. Fro li ultim carre prétermen passant on
cria:
- Oldon, ea ad-in li carre, salva te!
Li oldon di:
-
Deo va salvar me. - E il dura pregar.
Nivele de aqua cresce. Fro
li ultim bote prétermen passant on cria:
- Oldon, ea ad-in
li bote, salva te!
Li oldon di:
- Deo va salvar me. - E il dura
pregar.
Nivele de aqua cresce. Li oldon ja sede sur tecte. Li
helicopter vola, fro li helicopter on jetta li cordic scale:
-
Oldon, tene li scale, salva te!
Li oldon di:
- Deo va salvar
me. - E il dura pregar.
Li sequent grand unde vorat li oldon.
In
paradise li oldon incontra Deo. Li oldon questiona:
- Ho, Deo! Yo
pregat, que tu vell salvar me de inundation, ma tu ne salvat. Pro
quo?
Deo di:
- Qual stult hom tu es! Qui expedit por tu li
carre, li bote e li helicopter? Esque ne Yo?
*************
August 9, 2009
Vivet in li munde Indi Gallino.
Vivet il e ye tot tempor pensa pri su, pri to, quali es il, Indi
Gallino.
Quande il aparit fro ove, il strax pensat:
"Ay-yay-yay,
qual yo es micri! Yo deve crescer!"
Il comensat crescer. Il
crescet, crescet, e devenit grand quam un bon svinello.
Il
pensat:
"Ho! Qual grand yo es! Bon-garson!"
Vermen,
Indi Gallino devenet grand, adult, rubi pensettes crescet sub su
nase.
Il specta se in stagnette - disvolue su caude, pensa:
"Hay
qual yo es bell!"
Un litt puella ineat li corte, il jettat se
a la, gurguleat, gurguleat, timentat la tre multimen.
Il
pensat:
"To es yo! Qual yo es fort e brav!
Si il incontra
alqui, il sempre di:
- Ne burla, ne burla!
Tal il esset
seriosi.
Tamen un die venit, quande li mastressa intentet capter
Indi Gallino. Ma il ne permisset. Il saltat trans palissade e curret
ad-in foreste.
Il curre e pensa:
"Nu, esque vu ha captet
me? Vu menti! Yo es - o-ho - qual astut!"
Vu save, Foxa esset
ta ye apti témpore.
Ella cocinat Indi Gallino, sedenta se
dinear, e di:
- Ho, Indi Gallino! Tu durante tot su vive pensat
pri su, ma ne comprendet, quo es li essentie: qual tu es gustosi!
August 8, 2009
Un simie e un papagaye
controversat, qui fro ili du es plu simil a hom.
Li simie di:
-
Sin alcun dubite, yo es plu simil a hom. Mi visage es simil a homin
visage, mi maniere vader es simil al maniere de hom, in tot, yo
aspecte quam un hom.
Li papagaye di:
- To es bon, ma yo posse
parlar!
Li simie di:
- Tu pensa, quo yo fa nu? Esque yo ne
parla nu?
August 6, 2009
Along coridor de un universitate
li professor ea. Incontra li studiante. Li studiante di:
-
Salutes, professor. Esque vu vell permisser me questionar vos?
-
Yes, questiona, yun mann.
- Quande vu dormi, qualmen vu posi vor
barb, esque sub li covrimant o esque sur li covrimant?
Li
professor, pos quelc pausa:
- Hm... Vu save, yo ne pensat pri
to.
- Ye tal casu, pardona me.
Ili singul eat su via.
Pos un
semane li professor denov incontra li studiante. Li professor have
insan verdi color del visage, ombres circum ocules. Il di al
studiante:
- Vu es malard. Yo durante tot semane ne posset dormir,
por me talmen ne es comfortosi, e altrimen anc ne es.
August 5, 2009
Un mann inea un cafeeria. Con li
mann un cano ea. Li mann paría, que su cano va parlar nu. Ma
li cano silenta. Li mann paya parí, tot cafeeria ride, li mann
forea.
In externe li mann questiona su cano:
- Yo perdit grand
pecunie, e li culp es tui. Pro quo tu ne parlat?
Li cano
responda:
- Esque tu ne comprende? Imagina, quant grand pecunie
noi va ganiar deman!
August 4, 2009
Simia sede che rive del rivere,
plongea in ti rivere un bananin cruste. Prétermen un crocodil
svima. Crocodil questiona:
- Quo tu fa?
Simia responda:
- Si
tu va dar me un dollar, dunc yo va explicar.
- Hay un dollar,
di.
Simia prendet dollar e di:
- Yo humidifica un bananin
cruste.
- Por quo?
- Yo simplimen humidifica un bananin cruste.
Nequo plus.
Crocodil admirat e di:
- Tu es idiota, Simia.
Simia
responda:
- Forsan yo es idiota, ma yo ne forea fro ti-ci loc sin
$30.
August 3, 2009
Leporo inea un micri
magasin. Li hósped self vendi merces. Leporo questiona:
-
Esque vu have cacáo?
Li hósped responde:
- Ne,
noi ne have cacáo.
In sequent die denov Leporo inea e
questiona:
- Esque vu have cacáo?
- Ne, noi ne have
cacáo.
In triesim die denov Leporo veni in li magasin e
questiona:
- Esque vu have cacáo?
Li hósped
devenit colerosi, il cria:
- Noi ne have cacáo, e si tu va
venir ací un vez plus por questionar pri cacáo, dunc yo
va clovar tui oreles a mi vendi-table.
In sequent die Leporo denov
veni in li magazin. Il questiona:
- Esque vu have cloves?
Li
hósped:
- Ne! Noi ne have cloves!
Leporo:
- Alor,
esque vu have cacáo?
August 2, 2009
Un actor durante alquant
témpore esset sin labore. Su amico telefona a le e di:
-
Escuta, ci un micri rol aparit, yo strax pensat pri tu.
Li actor
di:
- Mersi, qual es li rol?
- Tu comprende, it es tre micri,
solmen un frase.
- Esque solmen un frase? Sin problemas. Quo es ti
frase?
- "Ho! Yo audi, cannones tonnera!"
- Esque
"Ho! Yo audi, cannones tonnera?" Es apt. Adú ear?
-
Ea in mercurdi ad-in teatre M, trova regissor N.
- Bon.
In mercurdi li actor veni
in teatre M, trova regissor N. Li regissor demanda:
- Di li
frase.
Li actor declama con patos:
- "Ho! Yo audi,
cannones tonnera!"
- Bon, - li regissor di. - Li rol es vor.
Veni in saturdi a 7 hores in vesper por participar spectacle.
-
Acceptet, - responde felici actor.
Pro grand joyo li actor
comensa trincar. Il trinkat durante jovedi, venerdi e saturdi. In
saturdi ye 6.30 de vesper li actor rememora, que il deve luder su rol
in li spectacle. Il curre ad-in li teatre, durante tot su via il
repeti su frase "Ho! Yo audi, cannones tonnera!"
Chel
teatre on ne permisse li actor inear li teatre sin bilet.
- Yo es
"Ho! Yo audi, cannones tonnera!"
- Vu es "Ho! Yo
audi, cannones tonnera?" Dunc vu passa.
Li actor ea a-detre
culisses. On ne permisse.
- Yo es "Ho! Yo audi, cannones
tonnera!"
- Vu es "Ho! Yo audi, cannones tonnera?"
Pro quo vu es tanti tard? Rapidmen ea ad-in grimeríe!
Grimeressa
questiona:
- Quo es vu?
- Yo es "Ho! Yo audi, cannones
tonnera!"
- Vu es "Ho! Yo audi, cannones tonnera?"
Tre tard! Sedenta se ci, yo rapidmen va grimisar vos.
Vestisat e
grimisat actor curre ad-sur scene. Sur li via li regissor capte le.
-
Esque vu es "Ho! Yo audi, cannones tonnera?"
- Yes, yo
es "Ho! Yo audi, cannones tonnera!"
- Vu presc es tro
tard! Ea, nu es vor apariment.
Li actor intra li scene, prende
solemni posa, collecte aer in su pulmones, e in ti moment il audi
detre su dorse bruosissim explosion!
Li actor cria:
- Ho!
Diabol! Quel idiot fat it? Yo presc assurdat!
Juli 30, 2009
Erudit e Programer
aviat fro Moskva a New York, sedent in vicin. Erudit proposi a
Programer luder un interessiv lude. Programer tre volet dormir, il
di, que il ne vole luder, e il posa se apu fenestre por dormir
tranquilmen. Tamen Erudit insiste, il di, que li lude es tre
interessiv e simpl. Erudit di:
- Yo questiona vos. Si vu ne save
li responde, vu paya me quin dollares. Poy vu questiona me. Si yo ne
save, yo paya vos quin dollares.
Programer denov politessimen
refusa e torna se a fenestre por dormir. Ma Erudit ne posse sider
tranquilmen. Il di:
- Esse consentient. Lass nos luder talmen: Si
vu ne save li responde, vu paya me $5. Ma si yo ne save li responde,
yo paya vos $50!
Programer devenit interessat. Plus il vide, que
ne es simpli liberar se de Erudit. Il consenti.
Erudit
questiona:
- Quant es distantie inter Terra e Lune?
Programer
ne di mem un parole, il tira fro su portamone $5 e da it a Erudit. Nu
es li torne de Programer.
- Quo passa ad-supra sur tri pedes, e
passa ad-infra sur quar pedes? - Programer questiona Erudit e torna
se a fenestre por durar dormir.
Erudit ne save. Il prende su
laptop, sercha in internet, invia li question a su conossetes. Necu
il posse trova li responde, nequi save. Pos hor Erudit sucusse
Programer, da $50 a il. Programer prende quinant dollares, mette it
ad-in su portamone e torna se dormir.
Erudit sucusse Programer:
-
Qual es li responde?
Programer tira fro su portamone $5, da it a
Erudit e denov torna se a fenestre por dormir til New York.
Juli 27, 2009
Pupes...
Róbots...
Homes ja adult dura luder con pupes, e ti pupes
es róbots. Róbots hodie es ne solmen un miracul de
tecnologies, ma anc ili es un nov arte, e ili es participantes de
arte.
In modern arte un sfere existe, ú san homes, qui ne
trovat plu bon aplication por su energie, fa ti labore, quel es plu
apti por róbots. Ili marchada sur podium demonstrant
vestimental moda. Un ad altri simil qualmen róbots fro un
serie.
Róbots vell posser demonstrar moda in nocte e jorne
sin fatigation. Hodie róbots ancor ne posse marchar qualmen
professional modelles. Ma ili fa su unesim passus.
HRP-4C
havet su debut
in li semane de Japonesi moda in Tokio, quel esset apertet in marte,
23, 2009.
In ti ci juli in li demonstracion de moda fro Parisal
collection de couturier Yumi Katsura in Osaka HRP-4C esset vestit in
robe de sponsa.
Kazuhito Yokoi fro Japonesi National Institut de
Scienties e Tecnologies dit: "Quam patre de sponsa yo senti me
felici e trist in li sam tempore."
http://www.membrana.ru/lenta/?9476
Juli 26, 2009
Recentmen noi ha
recivet information pri colorosi saponic globes fro Unit States. In
Japonia ones anque ha dit su parol, ili comensat producter colorosi
bir. Pigmentes blu e verdi es extractet fro marin herbes, e rubi es
fro savaji
rose.
http://www.membrana.ru/lenta/?9480
http://www.takahasi.co.jp/beer/
Colorosi
saponic globes es de du colores, e du botelles custa $15.
Colorosi
bir es de tri colores, e tri botelles custa $16.
Question: si
Chinianes va producter sigarettes con colorosi fum, quant vell esser
colores, e quant vell custar?
Juli 21, 2009
Atiñementes
de modern saponiglobistica es indubitabil. Yo ne di ci pri aplication
de ti atiñementes in politica, ma pri reali lusida con real
saponic globes. Mastres de ti-ci arte posse exsufflar saponic globes
de incredibil grandore. Multi saponic globes posse fierosiar pri su
long vive.
Ma til hotempore ne
existet colorosi saponic globes. In li tot munde 200 milion botelles
de solution por saponic globes es vendit annualmen. On ne posse dir,
que ti saponic globes ne have colores. Contrimen, ili lude per omni
colores de íris. Ma iridic colores es pallid. Quo es pri un
saponic glob colorisat in un clar succosi color? Un inventor fro li
Unit States, Tim Kehoe expenset 15 annus e 3 milion dollares por
realisar su idé pri colorosi saponic globes. Colorisar saponic
globes ne es simpl. Nutrimental pigmentes colecte se in un mikri
makul in infre de glob. Ma quande pos long labor apti pigment esset
trovat, un altri probleme fat se visibil. Infantes ludent con
colorosi saponic globes have multi colorosi makules sur su vestiment
e pelle.
Nu es vendit saponic globes
de du colores, blu e rubi. Makules sur vestiment e pelle desapari pos
15 minutes. Esperantistes deve ne perdir esperantie haver verdi
saponic globes. Tim Kehoe dit, que il posse producter saponic globes
de omni colores.
http://dsc.discovery.com/news/2009/07/10/colored-bubbles.html www.membrana.ru/articles/simply/2009/07/17/182900.html
Juli 18, 2009
Ti-ci es li parole “subride” in quelc
lingues del munde. To es interessiv, serchar images in internet secun
li claval parole “subride” in pluri lingues.
Simplimen
clacca ad-sur li ligas in infra. (O copia li paroles e mette
les ad-in un internetal serchor, comanda “sercha images”).
Anglesi – smile
Hispanesi
– sonrisa
Italiesi
– sorriso
Francesi
– sourire
Germanesi
– Lächeln
Niderlandesi
- glimlach
Japonesi
– 笑み
[emi]
Chinesi – 微笑
[wei xiao]
Koreesi - 미소
[miso]
Russ – улыбка
[ulybka]
Bulgaresi - усмивка
[usmivka]
Polonesi – uśmiech
Tchek – úsměv
Arabesi – ابتسم
[ibtisama]
Ivrit – חיוך
[khiyukh]
Suomi – hymy
Magyaresi - mosoly
Iranesi – لبخند
[labkhande]
Turkesi - gülüş
Un plu grand colection de paroles “subride” in pluri lingues vide che http://en.wiktionary.org/wiki/smile
Juli 15, 2009
In un gazette tal anuncie aparit:
**********************
Nor
firma sercha un secretarie,
qui posse cocinar café,
tippar
che computor
e parlar extran lingue.
************************
Alor, ad-in li chambre, ú
li director del firma sede, un cano inéa. Li cano mette un
numeró del gazette, ú li anuncie es printat, ad-sur li
table del director.
- R-r-r-r-aw!
Li cano sedenta se ad-sur un
stul apud li table del director. Li director tre admirat, tamen
questiona:
- Esque vu posse cocinar café?
Li cano ea ad
apparate por café e fa café. Li director admirat plu
fortmen, tamen questiona plu:
- Esque vu anc posse tippar?
Li
cano ea a computor e tippa un text sin erres. Li director quasi cade
fro stul pro admiration, ma questiona plu:
- E qual extran lingue
vu parla?
Li cano:
- Mi-i-i-a-a-a-u!
Juli 12, 2009
Che un nave un
illusionist laborat. Il divertisset passageres del nave. Passageres
sempre esset nov, li trucs del illusionist esset li sam in chascun
perfomantie.
Li capitano del nave havet un papagaye. Li papagaye
videt li trucs mult vez, e il comprendet omni secretes del
illusionist. Li papagaye chascun vez bosillat trucs, criant frases
qualmen: "Li chapel es altri!", "Il cela li reyessa de
pics in un tasc de su pantalones!", "Li buxe have un
fore!".
Li illusionist tre colerat pro to, ma il ne posset
far alquo. Ya li papagaye esset li favorit del capitano.
Un vez
storm evenit, e dunc li nave submerget. Omni hat perit except li
illusionist e li papagaye. Ili flottat sur alcun lignin fragmentes.
Ili longmen regardat un altri, finalmen li papagaye di:
- Yo
admisse tui victorie. Ples dir me li secret, pro que yo ne posse
comprender, ú tu celat li nave?
Juli 9, 2009
Si vu es un eminent person, qualmen vu posse defender
vos contra esser fotografat? Un simpli remedie nu ha esset inventet.
Si li fotograf usa foto-fulmine, dunc li defensal apparate, havent
detectet it, strax producte respondent foto-fulmine. Li foto va esser
tro lucisat. Li existent variante del apparate es nu montet quam un
parte de feminal sachett.
Es li torn de paparazzi. Quo on posse
inventer por ili?
ahprojects.com/exhibitions/anti-paparazzi
Juli 5, 2009
Leporo sede sur stump,
scri alquo. Prétermen Fox curre:
F:
Quo tu scri, Leporo?
L:
Un dissertation.
F:
Pri quo?
L:
Pri to, qualmen lepores manja foxes.
F:
U tu videt tal casu?
L:
Ea con me, yo va revelar alquo.
Pos quelc tempor... Denov
Leporo sede sur stump, scri alquo. Lupo curre.
Lu:
Quo tu scri, Leporo?
Le:
Un dissertation pri to, qualmen lepores manja lupes.
Lu:
Esque tu es folli, Leporo?
Le:
Ea con me, yo va revelar alquo.
Poy. Leporo scri, Urso
aproxima se.
U:
Quo tu scri, Leporo?
L:
Un dissertation pri to, qualmen lepores manja urses.
U:
U on posse vider to?
L:
Ea con me, yo va revelar alquo.
..............
Li
sequent pictura:
Un
caverne, un monte de foxal, lupal, ursal osses. In li centre un grand
leon jace rodent un osse.
Resume:
Ne
to es important, quo es li tema de un dissertation, ma qui es curator
de un labor.
Junio 28, 2009
Un hom ha perdit su via in forest. Il comensa criar.
Pro li criada un urso avigila e approxima li hom.
Li urso
questiona:
- Pro quo tu cria?
Li hom responde:
- Yo
desirat que lass alqui har audit me.
Li urso di:
- Tu ha
atin'et tui scope, ma esque it va esser bon por te?
